Pas tre muajsh takimesh dhe bisedimesh me kandidatë të ndryshëm, Milani ka vendosur t’i besojë postin e drejtorit sportiv Igli Tares, ish-drejtorit të Lazios. Tare ishte prej muajit prill në bisedime me administratorin e deleguar të Milanit, Giorgio Furlani, dhe tashmë pritet vetëm firma përfundimtare.
Sipas burimeve për Corrier.it, marrëveshja do të jetë dyvjeçare me opsion për një vit të tretë. Tare gëzon mbështetjen e Zlatan Ibrahimovic dhe Gerry Cardinale dhe është vlerësuar pozitivisht edhe nga Moncada.
Milani, i përjashtuar nga kompeticionet evropiane dhe me ekipin e dytë të rënë në kategorinë e amatorëve, kërkon të vendosë pika të qarta për rilindjen. Zgjedhja e trajnerit të ri dhe rindërtimi i skuadrës do të jenë sfidat e ardhshme. Gjatë kohës së tij te Lazio, Tare realizoi disa arritje të rëndësishme, përfshirë transferimin e Sergej Milinkovic-Savic.
