Shkencëtarët pretendojnë se kanë gjetur shenja jete në një planet tjetër
Friday 18 April 2025, 12:49
TiranaPost
Shkencëtarët kanë bërë një zbulim që mund të ndryshojë mënyrën si e kuptojmë universin: ata besojnë se kanë gjetur shenja të mundshme jete në një planet të largët jashtë sistemit tonë diellor.
Planeti quhet K2-18b dhe ndodhet rreth 120 vite dritë larg Tokës. Ai është rreth 2.5 herë më i madh se Toka dhe rrotullohet rreth një ylli të ftohtë të kuq, në një zonë që mund të mbështesë jetë – aty ku mund të ketë ujë të lëngshëm.
Në atmosferën e këtij planeti, shkencëtarët nga Universiteti i Cambridge kanë zbuluar përbërje kimike si sulfiti i dimetilit dhe disulfiti i dimetilit – molekula që në Tokë prodhohen vetëm nga organizma të gjallë, si fitoplanktoni dhe disa baktere.
Zbulimi është bërë falë teleskopit më të avancuar hapësinor, James Webb, i cili analizoi dritën që kalonte përmes atmosferës së K2-18b.
“Kjo është prova më e fortë deri më tani që mund të ketë jetë jashtëtokësore. Nëse gjithçka shkon mirë, brenda 1 ose 2 vitesh mund të kemi konfirmimin përfundimtar,” tha udhëheqësi i studimit.
Nëse këto sinjale vërtetohen, atëherë jeta në univers mund të mos jetë një rastësi e rrallë, por diçka shumë më e zakonshme se sa kemi menduar deri tani.
