Video/ Shqiptarët që presin me durim, dy rrëfimet gjatë natës të dy emigrantëve që presim në radhë
E Shtunë 15 Gusht 2020, 06:00
TiranaPost
Të lodhur, por pa akuzuar kënd, pa bërtitur, siç të shkon në mendje, të paktën dy prej shqiptarëve që flasin për gazetarin e “Euronews Albania”, Renaldo Salianji, të prekin me durimin dhe fjalët pa tone apo nerva, që edhe po të qenë normale do ishin.
Gazetari Renaldo Salianji: Sa kohë keni që prisni?
Qytetari 1: Vajtën 48 orë, nga dje në mëngjes. Fjetëm mbrëmë në darkë, po flemë sot në darkë, të shikojmë do ikim nesër apo jo. Siç po e shikoni vetë këtu në makinë, po flemë gjumë dhe nuk e dimë se çfarë do të bëhet.
Gazetari: Keni kërkuar informacion nga pala shqiptare në doganë? Çfarë iu kanë thënë?
Qytetari 1: Thanë do rregullohet. Tani presim. Çfarë të them unë?
Qytetari 2: Kam që dje në orën 15:00 që ndodhem këtu për të kaluar për Greqi. Kemi lënë punën, i kemi lënë të tëra atje. Këtu nuk thonë asgjë se çfarë bëhet. Po rrimë këtu për 2 ditë rresht. Dhe nesër nuk e di a do kalojmë.
Gazetari: Pala shqiptare në doganë çfarë ju ka thënë?
Qytetari 2: Po kalojnë këta 10 nga 10. Kujt t’i besosh? Nuk ke kujt t’i besosh asnjërit!
Radhët kilometrike me palën greke janë fenomen në pikat kufitare gjatë muajit gusht, po në kushtet e pandemisë marrin tjetër peshë e ngjyrë. Aq më tepër që në Greqi, Shqipëria nuk ka as ambasadore dhe pothuaj një pjesë e mirë e stafit të Ambasadës u shkarkuan pak javë më parë, nga ministri i Jashtëm në detyrë, Gent Cakaj. Ky i fundit ditën e djeshme ishte me telefon të fikur.
Pala greke njoftoi dje se do rihapej në orën 6 të mëngjesit të ditës së shtunë, por nuk ka njoftuar nëse do të kishte personal shtesë apo lehtësira me kalimin. Të premten ministrja e Mbrojtjes, Olta Xhaçka, mbërriti ne Kakavijë dhe dërgoi edhe disa ushqime bazike, ujë, ekipe mjekësore dhe tualete të lëvizshme.
Lexo më shumë:
