Prindërit lajmërojnë protestë të enjten për vrasjen e Martinit 14 vjeç, por si ndodhi ngjarja tragjike
E Martë 19 Nëntor 2024, 19:36
TiranaPost
Prindërit do protestojnë ditën e enjte në orën 11:00 për vrasjen tragjike të Martinit, 14-vjeç.
Marshimi do të nisë nga Shkolla ‘Fan Noli’ drejt Ministrisë së Arsimit, nën moton ‘prindërit në protestë për sigurinë dhe arsimin e fëmijëve’.
Ky marshim ka për qëllim sensibilizimin e institucioneve dhe të shoqërisë, me qëllim që ngjarje të tilla të parandalohen në kohë.
Po si ndodhi ngjarja tragjike?
14-vjeçari Martin Cani, u sulmua me thikë dje, (e hënë, 18 nëntor) pas një konflikti me një moshatar tjetër, shumë pranë ambienteve të shkollës "Fan Noli".
Ngjarja ka tronditur të gjithë opinionin publik.
I mituri humbi jetën rrugës për në spital, pas plagëve të marra në zemër.
14-vjeçari, që kishte pasion futbollin, përshkruhet nga shokët dhe shoqet si një njeri joproblematik, i qetë dhe që i shmangej gjithmonë konfliktive.
Autori i ngjarjes, po ashtu 14 vjeç është arrestuar nga policia për vrasje me paramendim.
Çfarë e bën ngjarjen edhe më tragjike është fakti se autori pas ngjarjes postoi video me thikë në rrjetet sociale, duke mos shfaqur as pendesë e ndjeshmëri për jetën e pafajshme që mori, as për djaloshin tjetër që gjithashtu plagosi duke u përpjekur të ndalonte tragjedinë. Luisi, po 14 vjeç, shoku i Martinit që u përpoq të ndalonte ngjarjen, është në spital në luftë për jetën.
Shkaku i konfliktit dhe si ka rrjedhur ngjarja konkretisht, mbetet ende i paqartë. Ndërkohë që autori 14-vjeçar është vënë në pranga sot, një ditë pas ngjarjes.
