Mustafa Nano: Arsyeja pse Berisha ngriti padi kundër sekretarit Amerikan të Shtetit
E Enjte 20 Maj 2021, 21:36
TiranaPost
Sali Berisha njoftoi sot në konferencë për mediat se do t’i përgjigjet me padi për shpifje Sekretarit Amerikan të Shtetit, Anthony Blinken, i cili një ditë më parë njoftoi vendimin e DASH për shpalljen non grata të tij në SHBA, bashkë me familjen.
Por sipas analistit Mustafa Nano kjo padi nuk është ngritur për të provuar akuzat ndaj tij. Analisti Nano thotë se askush nuk do shkojë në gjyq në Paris me Berishën.
Në intervistë për MCN TV, Nano tha se ish kryeministri Berisha ka ngritur këtë padi që të mos heqë dorë nga mandati i deputetit.
“Kam përshtypjen që kjo padi nuk është ngritur për të provuar akuzat ndaj tij, askush nuk do shkojë në gjyq në Paris me Berishën. Ai e ka bërë këtë për të mos hequr dorë nga mandate i deputetit. Përndryshe do ishte pa alibi. Nëse s’do bënte këtë padi do ishte në listën e PD që duhen sulmuar.
Kjo është e gjitha. Kjo është bindja, vetëm për këtë arsye është bërë padia. Berisha e nisi karrierën e vet duke arrestuar liderin e opozitës në atë kohë, në 1997-ën u dogj Koha Jonë, ka fakte sa të duash që ka minuar demokracinë, por nuk besoj është kjo akuza që duhet përkthyer, por akuza për korrupsion”, tha Nano.
Analisti gjithashtu u shpreh se ky vendim i DASH për Berishën është thjeshtë finalizimi i një procesi. Sipas tij terreni është përgatitur prej kohësh ndërkohë që shtoi se edhe ambasadorja e SHBA në Tiranë, Juri Kim që kur ka ardhur nuk e ka takuar asnjëherë Berishën.
“Ky vendim do merrej sepse është finale e një procesi. Juri Kim që kur ka ardhur nuk e ka takuar asnjëherë Berishën, është përgatitur terreni për të vepruar. Juri Kim e ka injoruar dhe nuk ka lindur tani vendimi, është një gjë e pjekur prej kohësh. Por një përgjigje mund të ishte se Reforma në Drejtësi po jep fryte”, tha Nano.
*Tiranapost.al.
