Maria De Filippi me djalin e saj në homazhet për nder të Maurizio Costanzos
Saturday 25 February 2023, 14:21
TiranaPost
Qindra njerëz janë mbledhur për t’i bërë homazhet e fundit ikonës së televizionit italian Maurizio Costanzos, i cili u nda nga jeta dje në moshën 84-vjeçare.
Maria De Filippi bashkë me djalin e birësuar të çiftit, Gabriele, u shfaqën të përlotur në rreshtin e parë ku ndodhen të afërmit dhe miqtë e ngushtë të familjes.
Prezantuesja e veshur me kostum dhe syze të zeza përpiqet të ngushëllojë të birin, përpara njerëzve të shumtë që mbërrijnë për të bërë homazhe për të shoqin.
Në mëngjes për të bërë homazhet ndaj ikonës së televizonit italian ishte edhe kryetari i Bashkisë së Romës, Roberto Gualtieri.
“Ishte një njeri me profesionalizëm dhe humanizëm të jashtëzakonshëm,” e përshkroi kryetari i Bashkisë së Romës Roberto Gualtieri.
“Ai ka ndihmuar miliona italianë të kuptojnë dhe eksplorojnë jetën, në mënyrën e tij të mprehtë, të matur e kurioze”, tha gazetari dhe ish politikani Francesco Rutelli.
Ndër emrat e njohur që kanë mbërritur deri tani janë Gianni Ippoliti, Mara Venier, Pierluigi Diaco, i cili shpërtheu në lot, Rudy Zerbi, Ermete Realacci dhe Valerio Mastandrea, i cili hyri me një trëndafil në dorë.
“Nga ai mësova jetën dhe humanizmin. Një gjë që i thonim gjithmonë njëri-tjetrit ishte se u takuam vonë. U përpoqëm të gjenim ide për qytetin që të dy e duam. Zbulova një person me humanizëm shumë të madh,” deklaroi ish-kryetarja e Bashkisë së Romës Virginia Raggi.
Dhoma Promoteca në Campidoglio ku po zhvillohen homazhet do të qëndrojë e hapur edhe ditën e nesërme, ndërsa varrimi do të bëhet të hënën në Kishën e Artistëve në Piazza del Popolo në Romë.
