Dy pishinat më të veçanta në Itali, për të cilat ia vlen një udhëtim
E Premte 12 Gusht 2022, 10:20
TiranaPost
Ka dy pishina të mrekullueshme në Itali që ofrojnë një përvojë unike dhe admirohen në të gjithë botën.
Ato gjenden njëra në Bolzano dhe tjetra në Viterbo.
Pishina Sky, një xhevahir në zemër të Dolomiteve
Pishina më e bukur në veri të Italisë ndodhet në Bolzano, në hotelin Hubertus rrëzë Dolomiteve (në një lartësi prej 1350 metrash). E quajtur Sky Pool për pamjen e pabesueshme që mund të shijohet ndërsa zhyteni në ujërat e saj, kjo pishinë panoramike ka pamje nga Dolomitet dhe duket sikur rri pezull në ajër me lehtësinë e një fluture.
Kjo pishinë, e cila “prek tokën, ujin dhe qiellin në të njëjtën kohë”, siç thuhet në faqen e hotelit, është e ngritur nga toka në rreth 12 metra dhe është e gjatë 25 metra. Ajo u ndërtua nga hotelieri Christian Gasser, i cili donte t'i shtonte hotelit të tij një pishinë nga e cila mund të admironi bukurinë e pamjeve tipike të Tirolit të Jugut.
E ngrohur gjatë gjithë vitit në një temperaturë prej 32 gradë, kjo pishinë përrallore është e veshur me gurë që ngjajnë me ata të zonës.
Pishinat termale relaksuese Carletti në Viterbo
Rreth 2 km nga Viterbo janë pishinat termale sugjestive Carletti, burime të vërteta uji natyrore me veti të mëdha. Banorët e zonës i quajnë thjesht 'Pozze', për shkak të ngjashmërisë së tyre me puset e mëdha natyrore të ujit të vendosur në kodrat e Lazios.
Uji i pishinave Carletti është hipertermik. Kjo do të thotë se temperatura e ujit të pishinës është midis 30 dhe 60 ° C dhe është e pasur me squfur, kalcium, fluor dhe magnez, si dhe kripëra minerale. Prandaj, ka shumë përfitime që mund të merren nëse zhyteni në këto ujëra. Në veçanti, pishinat Carletti janë një ilaç për sistemin e frymëmarrjes, riprodhimit dhe qarkullimit të gjakut dhe mund të japin një dorë të madhe në luftimin e sëmundjeve të ndryshme të epidermës.
